Agorodd y llyfrgell sirol newydd gyntaf yng Nghymru ers 10 mlynedd yn y Barri ar y 4ydd o Ionawr 2007. Yn fodern, lliwgar a chroesawgar mae’r llyfrgell hon sydd ar ddau lawr yn cynnig y cyfleusterau diweddaraf un.

Mae’r llyfrgell yn cynnwys ystafell gymunedol a enwyd ar ôl Phillip John. Cysegrodd Mr John ei fywyd gwaith i’r gwasanaeth llyfrgell lleol ac ef oedd llyfrgellydd y fwrdeistref rhwng 1965 a 1976. Bydd Ystafell Phillip John ac Ystafell Gymunedol arall yn cael eu defnyddio ar gyfer cynnal amrywiaeth o weithgareddau ar gyfer y gymuned.

Mae’r llyfrgell yn cynnwys y casgliad mwyaf o lyfrau yn y Fro ynghyd â chasgliad helaeth o gerddoriaeth a chryno ddisgiau. Mae’n bosib i gwsmeriaid ddychwelyd a benthyca llyfrau eu hunain drwy ddefnyddio’r ddesg hunanwasanaeth. Mae prif lyfrgell gyfeirio’r Fro ar y llawr cyntaf.

Mae gan y llyfrgell adrannau arbennig ar gyfer plant a phobl ifanc. Mae adran y plant yn cynnwys llyfrau, cyfrifiaduron a chonsolau gemau. Mae’n bosib addasu’r rhan yma o’r llyfrgell i gynnal nifer o weithgareddau gan gynnwys gweithdai celf a chrefft a sesiynau stori. Dyluniwyd yr adran ieuenctid gan bobl ifanc yr ardal a ddewisodd gynnwys set deledu, llecyn i wrando ar gerddoriaeth, cyfrifiaduron, soffas a darn o waith celf a grëwyd gan ddisgyblion Ysgol Gyfun Bro Morgannwg yno.

Ar lawr cyntaf y llyfrgell mae Swît Technoleg Gwybodaeth a Chyfathrebu. Gosodwyd ciosg talu cyfrifiadurol yno fel y gall defnyddwyr dalu heb orfod ciwio wrth y ddesg. Mae’r llyfrgell yn llecyn chwilboeth sy’n golygu y gall defnyddwyr cofrestredig, ar eu gliniaduron eu hunain, ddefnyddio’r Rhyngrwyd drwy weinyddwr y Cyngor.